MIN
:
SEC

احتفل بساعة الأرض

لقد أغلقنا موقعنا دعماً لساعة الأرض، وندعوك للمشاركة.

إذا كان عليك تصفح موقعنا، يرجى التصغير للمتابعة.

تصغير
MIN
:
SEC
 
 

المدونة

 
حدد فئات الاتجاهات
 
 
أكتوبر 2017

اسعدي بطنك وريحي ضميرك

مين قال إن النقنقة هتقف ما بينك وما بين هدفك إنك تبقي صحية ورشيقة؟ ده بالعكس تماماً، تناولك للوجبات الصغيرة دي على مدار اليوم هي اللي هتديكي طاقة لليوم، وكمان هتسرع معدل الحرق عندك وتعود معدتك على الأكل بكميات أقل على المدى البعيد. بس قبل ما تفتكري إن دي رخصة للأكل اللامتناهي خلينا نقوللك على وصفات سريعة وخفيفة وصحية، وكمان لذيذة وبسعرات حرارية قليلة.


سلطة الـ"كابريزي" الإغريقية مع لمسة شرقية

المقادير:

-- شرائح طماطم
-- ريحان مجفف
-- توابل مجففة (لو حبيتي)
-- ملح البحر وفلفل
-- جبنة بيضة (أو موتزاريلا لو عايزة طعم مش حادق أوي)
-- خل بلسمي
-- زيت زيتون
-- دبس الرمان

الوصفة دي بقى مزيج منعش من سلطة الـ"كابريزي" الإغريقية مع الجبنة المصرية بالطماطم ولمسة لبنانية بدبس الرمان. قطعي شرائح من الطماطم وحطي قطع من الجبنة براحتك، على حسب اللي نفسك فيه.

رشي بلمستك الشرقية الحلوة شوية ريحان، وتوابل، وملح وفلفل. بس لو نفسك تبقي صحية أكتر حاولي تعودي نفسك على الوصفة من غير الملح، واللي هيسهللك كدة أكتر من ناحية الطعم هما حبة الخل البلسمي اللي هتزوديهم على السلطة مع دبس الرمان وزيت الزيتون.

وصفة بسيطة وسهلة التحضير مش هتاخد في إيدك خمس دقايق!

سلطة الكابريزي الشرقية : طماطم بالجبنة والتوابل 

لو نفسك في حاجة حلوة وصغيرة ومتاخدش أي مساحة في شنطتك وانتي بتخلصي مشوايرك حلك عندنا في المكسرات المغطاه بالعسل. ناس كتير أوي مبتقدرش الفوائد اللي موجودة في المكسرات مع إنها مليانة أوميجا-٣ وفيتامين E، إحنا بقى جبنالك وصفة بتوفرلك القيمة الغذائية دي، وعنصر الحلاوة اللي فيها من العسل هيخليكي تبعدي عن البدائل المسكرة الغير صحية.


المكسرات المغطاه بالعسل

المقادير:

-- كبشة مكسرات من غير نكهة (لوز، وكاجو، وعين جمل)
-- معلقة عسل كبيرة
-- سكر فانيليا

في طبق غويط، اخلطي العسل كويس مع سكر الفانيليا. العسل ده بيساعد على تعديل مستوى السكر في الدم وبيساهم في نمو البكتيريا المفيدة لجسمك، وكمان بديل مثالي للسكر.

حطي المكسرات وقلبيها لحد ما تتغطى كلها بالعسل. ولو نفسك في حاجة منعشة تكسر الحلاوة اللي في المكسرات ممكن تزودي مشمش مجفف أو توت بري،  وبعدين سيبي كل ده في التلاجة لمدة ساعة على الأقل. حاولي متزوديش العسل أوي عشان تحافظي على كمية معقولة من السعرات الحرارية. وبعد ما تخلصي بقى حطي كل ده في برطمان صغير على ذوقك ومعاه معلقة وانطلقي للعالم الخارجي وانتي مأمنة نفسك من أي جوع.

وجبة سريعة وحلوة للطريق: مكسرات مكسوة بالعسل


مضايقاكي الوصفات دي ونفسك في حاجة أتقل شوية وحلوة بس برضو صحية؟ يبقى أكيد الوصفة الجاية دي هتعجبك عشان هي عبارة عن بسكويت التفاح بزبدة الفول السوداني بس من غير عجينة – أيوة زي ما بنقوللك كدة، من غير الدقيق والسكر والملح كمان. يلا اكتبي معانا.


بسكويت التفاح بزبدة الفول السوداني

المقادير:

-- شرائح تفاح من اختيارك (أحمر أو أخضر)
-- زبدة الفول السوداني
-- قطع الشوكولاتة الداكنة
-- زبيب ومكسرات (اختياري)

جيبي تفاحة أو اتنين وقطعيهم لشرائح مدورة، وادهني مش أكتر من معلقة صغيرة من زبدة الفول السوداني على كل شريحة. بعدين رشي شوية زبيب وقطع الشوكولاتة، ومتنسيش المكسرات كمان لو عايزة، وبس كدة!
الشوكولاتة الداكنة دي هتظبط مزاجك وتعدللك ضغط الدم ومستويات السكر في جسمك.

إيه رأيك في الوجبة دي كبديل للقهوة ليكي على الفطار؟ هتكوني شيلتي الكافيين المضر والملئ بالحوامض بس هتاخدي طاقتك من زبدة الفول السوداني والشوكولاتة الداكنة، والكربوهايدرات المفيدة اللي في التفاح هتغذيكي.

مين قال إن البسكويت استحالة يكون صحي ومفيد؟

بسكويت التفاح بزبدة الفول السوداني مع المكسرات، والزبيب، وقطع الشوكولاتة الداكنة هتظبطلك مزاجك وتشبعك


بودينج بذور الشيا مع الفاكهة

المقادير:

-- ١/٢ إلى ٣/٤ مقدار من بذور الشيا
-- ٣ أكواب من حليب اللوز
-- ١-٣ معالق كبيرة عسل

الإضافات المقترحة:

-- جرانولا
-- فاكهة طازجة (توت، وشرائح تفاح، وأناناس، وخوخ، وكيوي)
-- رقائق جوز الهند
-- شراب القيقب النقي
-- قرفة
-- مكسرات وبذور

أكلة كمان مش متقدرة كويس هي بذور الشيا مع إنها مليانة أوميجا-٣ وألياف بتديكي طاقة مهولة، ده غير فوائد تانية كتير منها إنها بتحسن حالة بشرتك، وبتساعد قلبك وجهازك الهضمي، وكمان بتقلل علامات التقدم في السن.

قلِّبي معالق العسل في لبن اللوز وزودي بذور الشيا، بعدين حطيهم مع بعض في برطمان وقلبيهم بعد عشر دقايق عشان ميكلكعوش. سيبي البودينج في التلاجة لمدة ٣ ساعات (أو يبقى أحسن لو طول الليل) لحد ما تلاحظي شكله بيتماسك شوية. وأخيراً حطي لمسة منعشة ومسلية من الإضافات زي قطع الفاكهة مثلا وبالهنا والشفا!

جربي بودينج الشيا الملئ بالفوائد


عصيان البطاطا المخبوزة

المقادير:

-- ٥ بطاطا متقشرة ومتقطعة
-- زيت زيتون
-- إكليل الجبل (روزماري)

للتتبيل:

-- مقدار ملح البحر
-- ١/٤ كوب فلفل
-- ١/٢ معلقة بابريكا
-- ١/٤ كوب بودرة ثوم

وجبة مثالية مستحيل تزعلي من أكلها وبالعكس دي بديل تحفة للبطاطس المحمرة عشان مفيدة جداً وخفيفة كمان، وتنفع مع غموس الزبادي أو الحمص! بس متنسيش تتبليهم بالملح والـ"روزماري".

افردي ورق زبدة على صينية الفرن، وفي طبق غويط حطي زيت الزيتون والتتبيلة واخلطيهم ببعض. بعدين حطي صوابع البطاطا واتأكدي انهم اتغطوا كويس بالتتبيلة، ووزعيهم بعد كدة على ورق الزبدة واخبزيهم في الفرن لمدة ٢٠ دقيقة لحد ما يبقوا مقرمشين ولونهم ذهبي على بني حلو.

بديلك المثالي والمفيد للبطاطس المحمرة: صوابع البطاطا الحلوة المخبوزة


 
فبراير 2017

برنامج التخلص من السموم في الربيع

خلاص الربيع وصل وجه الوقت إننا نروّق دولابنا ونرتب حياتنا، والأهم من كل دة إننا نصفي جسمنا من السموم وكل حاجة مضرة.

جسمنا بيمتص سموم ومواد مضرة ومواد زائدة ومواد حفاظة ومنبهات من خلال الأكل أو من خلال البيئة المحيطة بينا، وأجسامنا نفسها بتنتج السموم برضه، زي المخلفات اللي بتنتج من عمليات الحرق والتمثيل الغذائي في الجسم، ودة بيحصل في أي عمليات طبيعية زي الهضم أو التنفس حتى؛ بس ماحدش يقلق عشان الجهاز الهضمي والغدد الصماء والدورة الدموية بيتخلصوا من السموم دي أول بأول.

المشكلة هنا إن جسمنا بيتأثر جدًا من السموم اللي بيتم امتصاصها في الأكل والسكريات والكافيين وبتبقى موجودة مع قلة التمارين الرياضية كمان، ودة اللي بيصعب عملية التخلص منها بشكل طبيعي؛ وهنا بييجي دور عمليات وفترات التخلص من السموم.

مافيش طريقة واحدة بس ينفع يتقال عليها إنها الطريقة الصح للتخلص من السموم، الإنترنت مثلاً عليه طرق مختلفة كتير بأهداف متنوعة، ومدد ممكن تمتد من 3 أيام لحد شهر كامل.

ودة دليل للنقط الأساسية المشتركة بين أغلب برامج التخلص من السموم.

تخلص من الكحول والسجاير والسكريات والدهون المشبعة
دول من أكتر الحاجات غير الصحية المنتشرة واللي بيبقى صعب هضمها وبتأثر جدًا على أنظمة الجسم الحيوية في الوقت اللي بتحاول فيه الأنظمة دي إنها تتخلص من السموم وترجع عمليات الجسم الحيوية لطبيعتها.

اشرب مياه مصفاة
استغل وقت العطش وشرب المياه في إنك تتخلص من السموم اللي في الجسم وتنضف الكبد؛ ضيف ليمون حامض أو توت أو لمون عادي على المياه عشان تحس بانتعاش زيادة وتعلي من نسبة السوائل اللي بتدخل الجسم عشان تعادل الزيادة في الألياف اللي جسمها بيكتسبها من الخضار والفاكهة.

اعرق كتير
روح الساونا وخلي جسمك يخرّج كل السموم اللي فيه، ولو ماعندكش وقت خد حمام سخن مع الملح الإنجليزي واتخلص من المواد الزيادة في جسمك بالعرق.

اعمل تمارين رياضية لمدة ساعة في اليوم
سواءً كانت التمارين دي تمارين "بيلاتيس" ولا يوجا "آشتنجا"، طول ما التمرين فيه عرق وحركة جسمك هيبقى أنشط وأخف ومرتاح أكتر.

تأمل واتنفس
تصفية ذهنك بنفس أهمية تصفية الجسم وتنقيته، التأمل في كل حاجة واستيعابها هيساعد في إنك تخفف من روحك وتنقي قلبك وتخليك تتخطى كل المصاعب اليومية. جرب التنفس بعمق عن طريق إنك تاخد شهيق مدته كام ثانية وتحبسه وبعدين تخرج الزفير في مدة 8 ثواني.

مواد عناية بالجسم فيها تراكيب كيميائية أقل
غير مواد العناية بالجسم المليانة تراكيب كيميائية بمنتجات تانية طبيعية أكتر، استخدم جوز الهند كمعجون سنان مثلاً أو الزيت الطبيعي للشعر بدل الكريمات.

اكتشف طرق أكل متزنة وصحية ووزعها على مدار اليوم
ركز مع الخضار الورقي والفاكهة الصحية والعصاير الطبيعية المضغوطة وكل الأكل اللي بيحتوي على بقوليات والبروتين. أتكلم مع خبير تغذية واكتشفوا طريقة أكل تمشي معاك ومع جسمك.

سيب جسمك يأدي مهامه لوحده
ابعد عن الملينات والأدوية، أعضاء جسمك ممكن تتخلص من السموم كويس لوحدها، البرنامج دة بيساعد إن التخلص من السموم في الجسم يتم من غير ما يتدخل في وظايف الجسم الأساسية.

الخطوات البسيطة مع طريقة تفكير صحية وبرنامج غذائي كويس هيعملوا تغيير ضخم جدًا، ومع الوقت هتقدر تدمج الخطوات والبرنامج دة في حياتك اليومية العادية ويبقى دة روتينك من غير مجهود، وهتقلل من السموم اللي بيمتصها جسمك وتطلق العنان لوظايف جسمك كلها عشان تتم بالشكل الطبيعي والمطلوب. الوقت اللي هتعرف فيه السموم اللي بتدخل جسمك كل يوم وتحاول تتجنبها هو الوقت اللي هتشوف فيه ثمرة مجهودك وشغلك دة كله.

 
تحميل المزيد