قيم تجربتك معنا!

 

المدونة

 
حدد فئات الاتجاهات
 
 
أكتوبر 2017

دليلك للأكل في مول مصر

بقالك يوم بحاله بتتمشى في المول مع صحابك أو قرايبك وتعبت من كتر اللف والدوران لدرجة إن همك كله اتمركز في بطنك وفي أد إيه نفسك في أكلة تقيلة كدة تملا معدتك عالآخر – سواء حلو بقى أو حادق مش فارقة لكن المهم إنك تاكل وتتكيف .

المشكلة بقى إن جوعك اللي مجننك ده ممكن يسيطر على حواسك بأكملها ويحسسك إنك عايز أي أكل تشوفه قدامك بغض النظر عن لو كان نِفسك في الأكل ده أصلاً ولا لأ.

بس الكلام ده طبعاً مبينطبقش عندنا في مول مصر عشان إحنا جبنالك من الآخر ووفرنا ليك دليل لشوية أماكن عندنا فيها أي أكلة نفسك ممكن تهِّف عليها.


 نفسك تحلّي بحادق (ممكن أصلا؟) عندنا "حلاوة الجبنه" من تمارا

قبل ما تقول جبنة إزاي في طبق حلو تخيل معانا كدة: صوابع سخنة من الجبنة الحلوة ملفوفة في عجينة دافية وطرية وغرقانة في صوص شبه العسل وعليهم شوية فستق. بذمتكوا مجعتوش؟

حلاوة الجبنة' عجينة طرية جواها جبنة سخنة وفوقيها شراب حلو وفستق

"غزل بيروت" من تمارا هيجننك من كتر حلاوته

ملكش في الحادق؟ مش مشكلة عشان تمارا عاملين "غزل بيروت" هيشقلبلك دماغك من كتر ما هو بسيط ولذيذ في نفس الوقت؟ أيواً، عشان فيه طبقتين من غزل البنات الهش أو "حلاوة الشعر" اللي  بتزغزغ لسانك وقبل ما تختفي على طول بتفوقهولك بآيس كريم مستكة وهو بيدوب بمنتهى السلاسة في بقك.

'غزل بيروت' هتزغزغ لسانك بأغرب مزيج ما بين حلاوة الشعر والمستكة في مول مصر


خلينا في التقيل: "كلاسيك سماش" من سماش برجر


بتحب البرجر والجبنة؟ الكلاسيك سماش بقى مش أي تشيز برجر ، ده منظر سُمك الباتي لوحده كفيل بإنه يقوم كل غرايزك الوحشية. ومش بس كدة، ده كمان عليه جبنه سايحة وخيار مخلل عشان يديك الملوحة اللي تظبط الطعم مع تتبيلة الـ"باتي" وتخلي البرجر ده كله على بعضه .. حاجة من الآخر. خلصانة.

محبي اللحوم لازم يجربوا الـ'كلاسيك سماش' في مول مصر


محتاج دَفعة طاقة سريعة؟ جرب ال"آيس كوفي" من كاريبو

فرهدت ورجلك وِرمت من كتر المشي وحاسس إنك عايز تترمي على أقرب سرير؟ مفيش الكلام ده لو جربت ال"آيس كوفي" في كاريبو. الكريمة اللي فيها الكمية الصح من القهوة والسكر مش بس هتفوقك لكن هتخليك تتنطط.

الـ'آيس كوفي' من (كاريبو) هيصحصحك ويفوَّقك ويشحن طاقتك لباقي اليوم في مول مصر

جعان بس خايف على "الفورمة"؟ عندنا سلطة السلمون المدخن مع الجمبري من فايكينج

نفسك في أكلة تشبع بس تَعب الجيم واجع قلبك وبتصعب عليك نفسك لو عكيت؟ قبل بس جو الدراما الحزين ده متقلقش عشان سلطة السلمون المدخن مع الجمبري اللي في فايكينج هتديك جرعة البروتين والأوميجا ٣ اللي جسمك هيحتاجها مع الألياف في الخس وحلقات البصل الأحمر، وشوية دلع كدة في صوص الكوكتيل عشان بقالك كتير بتمشي برضو فا ليه لأ يعني؟

سلطة السلمون والجمبري من فايكينج في مول مصر

نفسك في سبايسي؟ جرب أجنحة الـ"بافالو" المخلية من تشيليز

حلو تلاقي، حادق تلاقي، وحرّاق كمان تلاقي! تشيليز عندهم أجنحة "بافالو" مخلية هتديك جرعة بروتين مقلية بتتبيلة سبايسي. بس لو حسيت إنك مش قادر من الطعم السبايسي خد شوية من الغموس البارد اللي بييجي مع الطبق وهيساعد في الترطيب مع الخضار.

جرب أجنحة البافالو السبايسي من تشيليز في مول مصر

أحلى ثرو باك للسبعينات: ميلك شيك "الباتِر فينجر" من سماش برجر

لو كلت ولسة حاسس إنك محتاج تحبس بحاجة حلوة وبتحب جو السبعينات الأمريكي، يبقى تجري على سماش برجر من غير تفكير عشان تطلب ميلك شيك الـباتِر فينجر. ليه تجيب آيس كريم لما ممكن تجرب حاجة زيه مسكرة وتقيلة بالزبدة، وفوق كل ده تختار الطعم اللي نفسك فيه كمان؟

عيش جو السبعينات مع ميلك شيك الباتِر فينجر من سماش برجر

الحاجة الحلوة اللي عمرها ما تخَيِّب: "جاتوه سواريه" من لابوار

ينفع تروح عزومة عند حماتك بإيد ورا وإيد قدام؟ لأ طبعاً وعشان كدة لابوار بيقدملك حل سريع ومناسب لأي وقت وأي مناسبة بالـ"جاتوه سواريه" اللي مضمون إنه يخلص في أول ساعة من القعدة. هيديك اختيار من جاتوه خفيف أو هش أو طري لدرجة إن الناس مش هتبقى عارفة تلاحق على إيه ولا إيه.

جاتوه سواريه من لابوار في مول مصر

زهقت من الجو التقليدي؟ جرب ال"جولد بارز" من باتشي

عايز تخرج عن إطار العادة والتكرار وتعمل دوشة في العزومات؟ باتشي عملّك "جولد بارز" من حليب الشوكولاتة مخصوص تضمنلك كل اللي في القعدة يسألوا انت جبت الشوكولاتة منين. ابقى قوللهم ييجوا هنا بقى وسيب الباقي علينا.

جولد بارز بحليب الشوكولاتة من باتشي في مول مصر



 
فبراير 2017

هقدر ابقى نباتي ولا هعطل؟

فكرة الالتزام بنظام غذائي دي تعتبر تحدي لوحدها، ما بالك بإنك هتسيب نمط حياة كامل من الأفعال المنتشرة اللي بتتعمل كل يوم. النظام النباتي، هو نظام تغذية وحياة مختلف وبقى منتشر دلوقتي، وبيبقى سهل جدًا عند ناس، وعند ناس تانية بيبقى أشبه بتسلق جبال الألب.

ايه بقى النظام النباتي دة؟

هو رفض أي حاجة تعني إن الحيوان ملك للإنسان أو مصدر من مصادر الأكل أو الشرب بالنسبة له. النباتيين بيحاولوا بقدر الإمكان إنهم يبعدوا عن أكل أي حاجة بتيجي من الحيوانات إيمانًا منهم بحق الحيوان في إنه يعيش حياته بشكل طبيعي ويموت بدون تدخل الإنسان.

الموضوع أبعد من إنك تمنع نفسك من أكل اللحمة أو الفراخ أو السمك أو البيض أو العسل أو شرب اللبن، الموضوع فيه إنك تبعد كمان عن استخدام الفرو والجلد ومساحيق التجميل والصابون اللي بيدخل في تكوينهم منتجات حيوانية.

 

الموضوع شكله صعب، مش كدة؟

هو مش صعب أبدًا للناس المؤمنة بحق الحيوان في حياة كريمة، وبيتعرضوا لكل حاجة بتحصل في مزارع الإنتاج الضخم ومصانع مستحضرات التجميل ويواجهوها بشجاعة. كل حاجة اتغيرت تمامًا عن أيام ما كان الإنسان بيصطاد ويزرع ويكتفي ذاتيًا. دلوقتي احنا بننتج كميات ضخمة جدًا من المنتجات الحيوانية وبنهدر مصادرنا الطبيعية وندمر الطبيعة بأبشع الطرق الممكنة، والبقر والفراخ بالنسبة للنباتيين كائنات رقيقة ولطيفة زيهم زي القطط والكلاب اللي بنربيها في البيوت، ومايستاهلوش إنهم يعانوا لوحدهم بس عشان متعة الإنسان.
طب هل كدة فيه عناصر غذائية النباتيين بيفتقدوها؟ زي البروتين مثلاً؟

في الحقيقة دة كلام غلط.

النباتيين ممكن ياكلوا أي نوع فاكهة أو خضار، زي المكسرات والحبوب والكربوهيدرات والفول والبقوليات (زي التوفو والإدامامي واللوبيا والفاصوليا السودا والحمص والعدس)، إلخ. النباتيين بياخدوا البروتين اللي محتاجينه من حاجات زي العدس والتوفو والبسلة وزبدة الفول السوداني واللوز والسبانخ وعيش من القمح بالكامل والبطاطس والبروكلي والكرنب. وبدائل اللحمة ممكن تبقى حاجات زي البرجر النباتي والسوسيس النباتي وحاجات تانية كتير. اللطيف في الموضوع إن صعب إنك تميّز الفرق في الطعم.

 

ابدأ بإنك تعرف، شوف الحيوانات بيتم التعامل معاها ازاي في المصانع ومزارع الحيوانات بسبب استهلاكنا الزيادة، وافتح دولابك وبص أو على المكياج ومنتجات التجميل المستخدمة واتأكد إن الحيوانات مابيتمش استخدامها في تجارب المنتجات دي. ابدأ بالتدريج إنك بقدر الإمكان تقلل استهلاكك للمنتجات المعتمدة على الحيوانات. مافيش مانع من إنك كل فترة تقع وتاكل وجبة عائلية أو أكلتك المفضلة لحد ما تبقى قادر تتخلى عن كل دة تمامًا. ما ترفضش من الأول فكرة إنك تكون نباتي عشان انت مش قادر تمشي عليها 100%، لو قدرت إنك تبقى نص نباتي دة نجاح كويس جدًا كبداية.
لازم كل واحد يبقى عارف اللي بيحصل في تصنيع الأكل والسلع الاستهلاكية اللي بنشتريها. كونك ماشتريتش البلطو الفرو دة لوحده بيقلل من احتمالية اتساع الصناعة دي، وقول بشكل واضح إنك رافض أفعال الشركات دي ومش قابل استغلال الحيوانات.



 
تحميل المزيد